မိတ်ဆက်(၂)

``မြန်မာ့ အရုဏ်သစ် ပရဟိတ ``လူမှုရေး အသင်း



(၁)

 မနေ့က တစ်နေကုန်ပင်ပန်းနေသဖြင့် ညပိုင်းတွင် ပုံမှန်အိပ်ယာဝင်ချိန်ထက်စောပြီး အိပ်ယာဝင်လိုက်သည်။ အဲဒီလို အိပ်ယာဝင်ချိန်စောသွားလို့လားမသိ မနက်ပိုင်း အရုဏ်တတ်ချိန်တွင် လန်းလန်း ဆန်းဆန်းနိုးနေသည်။ ဆက်မအိပ်ချင်တော့၍ အိပ်ယာမှ ထကာ ခြံအပြင်ထွက်ပြီး လမ်းပေါ်တွင် အရုဏ်ဦး၏ ရူ့ခင်းတို့ကို ခံစားနေမိသည်။


 အရုဏ်သစ်၏ လေပြေလေညှင်းတို့သည် လတ်ဆတ်လှသည်။


 အရုဏ်သစ် က ဘဝ၏ နွမ်းနယ်ပင်ပန်းမှုတို့ကို တဖန် လန်းဆန်းတတ်ကြွစေသည်။


 အရုဏ်သစ်က မနေ့က ပင်ပန်းဆင်းရဲခဲ့သမျှကို လျှော်ဖွတ်သန့်စင်စပြေီး ခွန်အားသစ်တို့ ရစေသည်။


 အရုဏ်သစ် က မောပန်းနွမ်းနယ်နေသော ဘဝဒုက္ခတွေကို မေ့ပျောက်စေခဲ့သည်။


 အရုဏ်သစ် က စိတ်သစ်၊ လူသစ်၊ ခွန်အားသစ် တို့ကို အသစ်တစ်ဖန် မွေးဖွားစေခဲ့သည်ဆိုလျှင်------


(၂)

 ကျွန်တော်တို့မိသားစုက ထုံးစံအတိုင်း တီဗွီ စီးရီးတွေကို ကြည့်လျှင် ကိုးရီးယား ဒရမ်မာ ကားများကို ကြိုက်ကြသည်။ ကျွန်တော်ကတော့ တမူထူးခြားစွာ တောရိုင်းတိရိစ္ဆာန်တို့၏ ဘဝရှင်သန်မှု အလေ့အထတွေကို ရိုက်ကူးတင်ဆက်ပြသော NGC Wild အစီအစဉ်ကိုကြိုက်သည်။ ထိုအစီစဉ်ကို ကြည့်ရင်း ရင်ထဲတွင် ခံစားချက်တစ်ခု စွဲကျန်နေခဲ့သည်။ အခြားမဟုတ်ပါ။ တိရိစ္ဆာန်တို့၏ သဘာဝတွင် အစာကို ကိုယ်တိုင်ရှာဖွေစားသောက်ရင်း အသက်အရွယ်ကြီးရင့်၍ အစာကို ရှာမစားနိုင်လောက်အောင် အိုမင်းရင့်ရော်သောအခါ အစာရေစာ ရှာမစားနိုင်သဖြင့် ငတ်ပြတ်ကာ အသက်သကြေရခြင်း နှင့် မိခင်၏ စောင့်ရှောက်မှု မလွတ်ကင်းသေးသော သားပေါက်များ၏ ဘဝတွင်လည်း မိခင်သည် အခြားသားရဲ ကြီးများ၏ သတ်ဖြတ်စားသောက်ခြင်းကို ခံရလျှင် ထိုသားပေါက်ကလေးများမှာလည်း ရှာဖွေကြွေးမည့် မိခင်မရှိသဖြင့်၊ အကာအကွယ်ပေးမည့် မိခင်သေဆုံးသွားသဖြင့် သူတို့လည်း သေကျေပျက်စီးကြရသည့် မြင်ကွင်းတို့ပင်ဖြစ်သည်။


 ကျွန်တော်တို့ လူသားတွေရော----


 အကြောင်းအမျိုးမျိုးကြောင့် သားထောက်သမီးခံမရှိပဲ ကိုယ်တိုင် ရှာဖွေစားသောက်နိုင်စွမ်း မရှိတော့သော သက်ကြီးရွယ်အို မှီခိုရာမဲ့ ဘိုး၊ ဘွားများ------


 အကြောင်းအမျိုးမျိုးကြောင့် မိဘမဲ့သွားရရှာသော အရွယ်မရောက်သေးသည့် လူမမယ် ကလေးသူငယ်များ------------


 သဘာဝဘေး အန္တရယ် နှင့် စစ်ဘေး စစ်ဒဏ်ကြောင့် အတိဒုက္ခရောက်ကာ ရှာဖွေလုပ်ကိုင်စားသောက်ဖို့ ထက် ရှင်သန်ဖို့ပင် မလွယ်ကူသော အပြစ်မဲ့ပြည်သူများ-----


 အရွယ်ရောက်၍ ရှာဖွေစားသောက်နိုင်လင့်ကစား မိဘ ညီအကိုမောင်နှမ လုံးဝမရှိပဲ တစ်ကောင်ကြွက် ဥတစ်လုံး ဘဝဖြင့် ယုတ်ညံ့သော လူသားအချို့၏ အန္တရာယ်နှင့် ရင်ဆိုင်နေရသော အားငယ်နေသည့် သူများ--


 ထိုထိုသောသူများကို ကျွန်တော်တို့ မြန်မာ့အရုဏ်သစ် ပရဟိတ အဖွဲ့မှ အုတ်တစ်ချပ်သဲတစ်ပွင့် ပင်ဖြစ်ပါစေ တတ်စွမ်းသောအားဖြင့်--


 အရဏ်သစ်၏ လင်းရောင်ခြည်ကဲ့သို့ ခွန်အားသစ်တို့ တစ်ဖန်ဖြစ်စေမည်။


 အရုဏ်သစ်၏ လေနုအေးသို့ လန်းဆန်းမှုတို့ကို တစ်ဖန်ဖြစ်စေမည်။


 အရုဏ်သစ်၏ နခြေည်နုကဲ့သို့ တတ်ကြွမှုတို့ကို တစ်ဖန်ဖြစ်စေမည်။


 အရုဏ်သစ်၏ လင်းကြက်တွန်သံကဲ့သို့ နိုးထလာသော ဘဝများအတွက် နှိုးဆော်ပေးမည်။


 အရုဏ်သစ်၏ မျှော်လင့်ချက် ခွန်အားများ နှင့်အတူ ``မြန်မာ့အရုဏ်သစ်``ပရဟိတအဖွဲ့ကို ကျွန်တော်တို့ အွန်လိုင်း သူငယ်ချင်းအပေါင်းအသင်းများ စိတ်တူ ကိုယ်တူ ဝန်ထုတ်ဝန်ပိုး မဖြစ်သော တာဝန်ယူမှုများနဲ့ ``အားငယ်သူ အားပေးပါ--- လဲနေသူ ထူပေးပါ`` ဟူသော မြန်မာစိတ်ထား တို့ဖြင့် ဆက်လက် ရှင်သန်ကြစေလိုကြောင်း နှိုးဆော် တိုက်တွန်းလိုက်ရပါတယ်ခင်ဗျား။


ကိုစိုးနိုင်


နောက် ကျွန်တော် အားသန်တာ ကစ်ခုက သွေးလှူတာဘဲ။ သွေးလှူဖို့ အတွက် လုပ်ချင်တယ်ဗျ။ (အဆိုပြုချက်)
****လူ့ဘဝ တွင် လူတွေသည် လိုအပ်ချက်များ များပြားလှလေရာမှ မိမိတို့သည် ပေးရန်မေ့နေတတ်ကြသည်။ ****
မိမိ တတ်နိုင်သည့်ဘက်မှ အုတ်တစ်ချပ် သဲတစ်ပွင့် ဖြစ်ရင်တောင် ကျေနပ်မိပါတယ်။



လွမ်းနေသူ


အရုဏ်သစ် ဆို တာ နေ့သစ်အနာဂတ် ကို ခွန်အားနဲ့ မွေးဖွား ပေးမဲ့ အစ ပါ။ တိုးတက်ပွင်းလန်းလာတော့ မဲ့ မြန်မာ့အရုဏ်သစ် အတွက် လူငယ်တွေ စုစည်းပြီး မြန်မာ့အရုဏ်သစ် ဆိုတဲ့ ပရဟိတအသိုက်အဝန်းလေး တစ်ခု ဖန်တီးတည်ထောင်ခဲ့ပါပြီ။ မြန်မာပြည်အတွက် ပိုမို ငြိမ်းချမ်းကောင်းမွန်တဲ့ အနာဂတ် နှစ်ကာလတွေ ရာစုတွေ ကို ဖန်ဆင်းဖို့ အတွက် ကျွန်တော်တို့ ရဲ့ မေတ္တာလက်များ ကရုဏာနှလုံးသားများ နဲ့ အတူတစ်ကွ လက်တွဲဝန်းရံ ရုန်းကန်တည်ဆောက်ကြပါစို့။


  


  


  


  


ကိုလင်းထက်ဆွေ(ခ) ကိုအောင်ကျော်မိုး


မြန်မာ့အရုဏ်သစ်၊ ပျိုးလုလု ရောင်နီ၊ လင်းလက်တော့မည့် နံက်ခင်း၊ တေးသီနေသော ငှက်ကလေးများ မြင်ရတော့မည့်အချိန်။ မျိုးဆက်သစ်တို့အတွက် ကောင်းမွေကို လက်ဆင့်ကမ်းနိုင်ဘို့ လက်ကမ်းကြိုလင့်တဲ့ ကဏ္ဍတစ်ခုမှာ တစ်ထောင့်တစ်နေရာက တို့များ တတ်အားသမျှ ကြိုးပမ်းကြပါစို့ ...။


/လူစိမ်း @ ဧးသိမ်း/